ស្រ្តីម្នាក់បានស្លាប់ភ្លាមៗក្រោយជួបឧបទ្ទវហេតុគ្រោះថ្នាក់ចរាចរណ៍

ខេត្តបាត់ដំបង៖ ស្ត្រីម្នាក់បានស្លាប់ភ្លាមៗក្រោយជួបឧបទ្ទវហេតុគ្រោះថ្នាក់ចរាចរណ៍រវាងម៉ូតូនិងកង់នៅវេលាម៉ោង ១៥និង៤០នាទី ថ្ងៃទី១២ ខែតុលា ឆ្នាំ២០២៤ នៅត្រង់ចំណុចខាងត្បូងរង្វង់មូលលោកយាយទេព ស្ថិតក្នុងភូមិអង់ សង្កាត់អូរចារ ក្រុងបាត់ដំបង។

ប្រភពពីពលរដ្ឋនៅកន្លែងកើតហេតុបានឲ្យដឹងថា ករណីគ្រោះថ្នាក់ចរាចរណ៍ខាងលើដំបូងឡើយគេឃើញស្ត្រីចំណាស់ម្នាក់ឈ្មោះ ខៀវ យ៉េន អាយុ៦៥ឆ្នាំ បានជិះកង់០១គ្រឿងទិសដៅពីជើងទៅត្បូង លុះមកដល់ចំណុចកើតហេតុ ភ្លាមនោះក៏មានម៉ូតូហុងដាឌ្រីម០១គ្រឿង បើកបរដោយយុវជនម្នាក់ទិសដៅស្របគ្នាបានជ្រុលមកបុកពេញទំហឹងបណ្តាលអោយស្ត្រីខាងលើស្លាប់ភ្លាមៗ ចំណែកអ្នកបើកបរម៉ូតូរងរបួសត្រូវបានសមត្ថកិច្ចដឹកបញ្ជូនទៅសង្គ្រោះព្យាបាលនៅមន្ទីរពេទ្យ។

ក្រោយពេលកើតហេតុសមត្ថកិច្ចជំនាញបានចុះមកធ្វើការវាស់វែងយកមធ្យោបាយទាំង២ទៅរក្សាទុកនៅការិយាល័យចរាចរណ៍ផ្លូវគោកដើម្បីរងចាំដោះស្រាយតាមផ្លូវច្បាប់ ចំណែកសាកសពត្រូវបានប្រគល់អោយសាច់ញាតិយកទៅរៀបចំធ្វើបុណ្យតាមប្រពៃណី។